冷知識

細個嘅時候，最多人同我講嘅說話係：「乜你左’YAU’咖！」果一刻，你只會回應對方一個微笑，跟住對方通常都會繼續以一個驚奇嘅眼光望住你。果一刻，我彷彿以為自己啱啱表演完一個魔術又或者係玩咗一場雜技。其實，成日聽人哋講左’YAU’呢個字，究竟左’YAU’係咩意思呢？個’YAU’又係點寫呢？我嘗試響網絡去找尋答案，結果發現嘅係,坊間竟然流傳唔同既版本！首先，要講解下咩叫左YAU。左’YAU’就係指一d習慣用左手使用工具既人，例如揸刀，揸筷子，用鉸剪。响中國或者台灣，會稱呼為’左撇子’又或者係’左利手’。而至於左YAU,係廣東話既讀法。响網上既資料，左YAU有唔同寫法，包括有: 【撓】【𠰋】【囿】【拗】【㕭】【優】【搲】。响咁多個搜尋🔍當中，我揾到一段由澳門電視台所製作既一個叫《粵音正讀》節目，其中一集就提到左’YAU’既正字應該係【左囿】。主持引經據典講出囿字既來源，大家可以在網上搵到該段影片。（影片來源：http://draw.re/5LCSN）除左影片外，亦有以文字作解釋既版本：〖左囿：是為“左撇子”之謂，意為左手慣用之局限，是以標簽為與常人之另類者。因先入為主的感覺，慣常是以右手處理事物，視之正常。所用右手處事者，並不以之為然。故未有云“右囿”者也。若論其字，愚意認其近音、義釋者，應為“囿”。“囿”有拘束、局限、聚攏之意，且其另有一音亦近。見【唐韻】于六切，音（哊）。第七入聲。益庶幾近矣！〗 （文字來源由獨醉書生 於 2010-1-29 16:11 編輯-http://www.bestfd.com/forum.php?mod=viewthread&tid=4834) 對於以古文作解釋,感覺上有D難以理解，請怒我才疏學淺。對比之下，我比較鍾意網絡上既另一個說法/寫法：【左優】左優指人「左手便利」，廣東人會說成「左yaau1」。其中的「yaau1」字，疑是「優」字。 「優」，意思「良好」。「左優」者，即「左手活動較為良好」。 至於「優」的讀音，《集韻》標「於求切」，即得「yau1」音。後來「yau1」的元音變化為「-aau」，便成了今天的「yaau1」。 由於粵音體系中並無「-aau」韻母，便誤以為「左yaau1」的「yaau1」屬有音無字。 （文字來源：https://hk.answers.yahoo.com/question/index?qid=20061108000051KK00349) 至於邊個先係正字，咁真係要問下Ben Sir先知道！！！